Kva gjorde møbelsnikkar ved Sortland Møbelfabrikk, Roald Hvidsten med draumen om ein gong å segla si eigen ekte Colin Archer – skøyte?
Jo, han tinga teikningar, kjøpte material som trongst og skaffa seg byggjeplass på historisk skipsbyggjargrunn i Røsbøvikjo på Huglo. Så brukte han 6000 – sekstusen – fritidstimar dei komande seks åra og bygde båten sjølve. 17. juni 1996 kunne «Eide Lift» løfta det rundt 30 tonn tunge kunstverket frå stranda og setja skuta på sjøen. Ein fin flokk tilskuarar applauderte storhendinga. 47 fotaren vart døypt «Sunniva»
30 år er gått, og den sjølvbygde Colin Archer’en held seg like flott. Det kunne forbipasserande sjå nokre dagar sist veke då Marta og Roald Hvidsten la årets tur innom gjestehamna i Evjo. Fire veker hadde dei segla langs sørlege del av kysten vår og opp til Oslo. Strekket frå Kristiansand til Leirvik via Utsira gjekk på to dagar, med frisk medbør og rundt åtte knops fart. Opp og ned med segla er reint muskelarbeid om bord.
Tidlegare år har «Sunniva» heist segla mot Nord-Noreg, over Nordsjøen til Shetland og Orknøyane, Skotland og Irland. I Sverige har mellom anna Gøtakanalen hatt besøk av seglarane som har hatt Radøy som heimstad sidan 2007. Der har det gått i jobb som lærar og sauebonde.
