Bilen som på kveldstid syttande mai la att deler av dekka i form av svarte krussedullar i brusteinen i rundkøyringa på Moloen, viste fram køyring i strid med paragraf 3 i vegtrafikklova. Det meiner politiet, som patruljerte i Leirvik denne kvelden og som merka seg at krussedullane nyleg var laga på staden.
Paragraf 3 blir ofta kalla «grunnregelen for trafikk», og slår fast at alle som ferdast i trafikken skal visa omsyn, vera aktpågivande og varsame. Føremålet er å hindra at det oppstår fare for skade, og å unngå at annan trafikk blir hindra eller forstyrra.
Etter det Stordront.no får opplyst har politiet motteke klagar på trafikken strekningen Hamnegata – Moloen . Politiet har området under oppsyn, og planlegg m.a. fartskontrollar. For ordens skuld: Hamnegata er skilta med 40 km/t som høgstee lovlege fart.