Med ein kraftfull versjon av «We are the world» avslutta første års elevane på musikklina ved Stord vidaregåande ein strålande flott solidaritetskonsert onsdag kveld. Lyttande i dei fullsette benkeradene i amfisalen på Vikahaugane, takka for stunda med ståande applaus. Imponerte som dei igjen vart, over dugande unge musikantar og songarar. Programmet var variert, og stadfesta eit mangfaldig val i musikkutdanninga.
Konserten var ein del av Stord Vidaregåande sin årlege solidaritetsdag til inntekt for utdannng for born og ungdomar i kommunen sin venskapsby Comalapa i Guatemala. Sidan 2017 har Stord-elevane sin innsats gitt utdanningsstipend til mange hundre ungdomar, som elles ikkje hadde hatt råd til å gå på skule.